Utanom arbeidet i NRK har Bruaset skrive meir enn 30 bøker, blant andre fem som handlar om menneske som lever langt utanfor allfarveg. Hausten 2022 kom den siste av «Der ingen skulle tru»-bøkene. Ho har tittelen Gjensyn og fortel om korleis det har gått med nesten alle dei som har vore med i programma.

I tillegg til dette er Bruaset ein etterspurd foredragshaldar. Denne hausten besøkjer han dei fleste pensjonistlaga i tidlegare Sogn og Fjordane fylke, og det er den siste boka foredraget byggjer på. Mykje uventa har skjedd med folket der ute, overraskingane er mange, røper han.

I tillegg til det han fortel, viser han bilete av stadene og folket, slik vi hugsar dei frå programma, og slik dei ser ut i dag. Etter foredraget blir det høve til å kjøpe bøker, gjerne med ei personleg helsing attåt.